Gebete 3 (Archiv)

Liäbä GOTT, ich bruuch Dini Füehrig i mim Lebä. 


Bitte liäbä GOTT, 

schenk mir Füehrig i Beziehig und Familiä, damit ich mit Achtig umgoh mit minä Liäbä, dass ich sie unterstützä, ihnä helfä, und Freud ha, für sie alles z'tuä, was ihnä guet tuet!

Zeig mir, HERR, wiän ich's cha besser machä!

Zeig mir Dini Wiisigä, Dini Wünsch, Dini Vorstellig a jedem Tag!


 Bitte liäbä GOTT, 

schenk mir Füehrig a mim Arbetsplatz, damit ich zuverlässig und fliissig bin, und mich dankbar ii'setzä, isch glich i welerä Arbet, als Arbetgeber, als Aag'stelltä oder Freischaffendä, mit Achtig und Aa'stand gegenüber dä Anderä ! 

Zeig mir, HERR, wiän ich's cha besser machä! 

Zeig mir Dini Vorsehig, dä Weg, wo Du für mich usg'lesä häsch!


Bitte liäbä GOTT, 

schenk mir Füehrig für jedi freii Zyt won'ich han, damit ich gueti Freizytaktivitätä us'lesä, damit ich mit dä, für mich richtigä, Menschä ab'machä, damit ich nöd i schlechti Kreisä und Sünd g'rotä!

Bitte hilf mir, g'nüegend vo minerä Zyt, Dir,  und dä wichtigschtä Menschä geh z'chönnä, dä Familiä, und allnä, wo Du mir suscht zuä'füehrsch, wo mich uf irgend ä Art nötig händ!

Zeig mir, HERR, wiän ich's cha besser machä, wiän'ich mich und mini Lebenszyt richtig ii'teilä und planä söll! Zeig mir Din Terminkalender, Dini Wünsch, wo Du für mich parat häsch!





Bitte liäbä GOTT, 

schenk mir Füehrig i allem, won'ich mich söll engagierä, damit ich zur rechtä Zyt am richtigä Ort bin, um iiz'griiffä, um z'berichtigä, um z'diskutierä und iiz'stoh! Bitte leite mich, dass ich die rechtä Wort findä i mim Engagement, i minä Briefä und G'spröch, um mich für s'Wohl und dä Friedä vo üsem Land, vo dä Menschä, vo dä Familiä, und au vo Sachä, treffend und starch iiz'setzä! 

Zeig mir, HERR, wiän ich's cha besser machä!

Zeig mir, wo mini Wort und Tatä nötig wäred, und gib mir bitte ganz viel Chraft, Muet und Enthusiasmus däzuä!


Bitte liäbä GOTT, 

schenk mir Füehrig i mim Lebensstil, damit ich Dini wunderschöni Schöpfig, und alles, wo mir Menschä bauä und g'fertiget händ, mit meh Achtig und Dankbarkeit behandlä! Bitte leite mich au, mich selber aaz'neh und z'achtä, mim Körper, wo Du mir für das Lebä g'schenkt häsch, meh Sorg z'hebä, ihn nöd kaputt z'machä, sowiit's mir selber möglich isch! Bitte chumm i mis Bewusstsii,und gib mir Aa'wiisigä für mini Ernährig und Körperpfleg, für Bewegig und Ruhezytä, für alles, wo guet für mich wär, damit ich cha g'sund bliibä oder wieder g'sund werdä!

Zeig mir, HERR, wiän ich's cha besser machä!

Du bisch min GOTT und König, min Lehrer und min Arzt! 


Bitte liäbä GOTT, 

erfülle mich mit Dim HEILIGÄ GEISCHT, und schenk mir Füehrig i mim Chrischt-Sii, damit ich voller Glaubä nach Dim Willä lebä und wirkä, damit ich mich für Dich engagierä, und niä ruhig bin, für Dich, JESUS CHRISTUS, wo Du dä einzig richtigi Weg, die einzigi Wohrheit bisch, iiz'stoh und Dich wiiter z'trägä, i dä Arbet und Freizyt, i dä Familiä, bi Fründä und Bekanntä, unter Andersgläubigä und Atheischtä, bi allnä Menschä, wo Du mir über dä Weg laufä lohsch!

Zeig mir, HERR, wiän ich's cha besser machä!

Zeig mir, wiän'ich Dis Liecht cha sii uf derä Welt, wo und wiän ich cha meh und besser redä über Dich, und wiän'ich Dich uf vielfältigschti Wiis chönnt wiiter trägä! Din Willä will ich erfüllä, a jedem Tag vo mim Lebä. Amen

Daniela Eberle

Jesus wir bitten DICH!